Njeriu i cili po akuzohet nga presidenti turk, Recep Tayyip Erdogan, se qëndron pas tentimeve për grusht shtet, Fetullah Gulen – dhe lëvizja e tij “Hizmet” – kanë një rrjet të gjerë arsimor në Kosovë dhe Shqipëri. Ky rrjet përfshin universitete, shkolla dhe çerdhe për fëmijë.
Lëvizja Gülen (Gylen) është një nga lëvizjet fetare më të rëndësishme në Turqi. Ajo e merr emrin nga themeluesi i saj, Fetullah Gulen – një hoxhe nga Anadolli, tashmë 75-vjeçar.
Ndjekësit janë të përfaqësuar gjerësisht në elitën politike, administrative, dhe tregtare të shtetit turk. Në nivel ndërkombëtar, Lëvizja është e njohur për sistemin e saj arsimor.
Në Shqipëri dhe Kosovë, ajo ka ndërtuar një rrjet shkollash nga cikli i ulët (Kolegjet Turke) deri në të lartin te cilat operohen nga “Turgut Özal Education Company” dhe “Fondacioni Arsimor Gulistan”.
Kolegji i shkollës fillore dhe të mesme të ulët e të larë, “Mehmet Akif College”, është një rrjet arsimor i cili është vendosur edhe në Shqipëri dhe Kosovë. E, që kjo shkollë është e ndërtuar dhe udhëhequr nga Lëvizja e Gulenit, është e konfirmuar nga vetë predikuesi islamik, i cili jeton në Pensilvania të Amerikës.
Në vitin 2010, në një shkrim të botuar nga Gulen në faqen e tij zyrtare të internetit Fgulen.com, tregon për vlerat e sistemit të tij shkollor dhe jep disa nga shembujt konkret të këtyre shkollave, duke përmendur në mesin e tyre shkollën “Mehmet Akif College” të Tiranës.
Shkollat e “Lëvizjes së Gulenit” në Kosovë udhëhiqen nga “Fondacioni Arsimor Gulistan”, e cila ka nën drejtim rreth gjashtë produkte të rrjetit dhe sistemit arsimor të Gulenit.
Prej tyre, katër kolegje të arsimit fillor dhe të mesëm me emrin “Mehmet Akif College – MAC”, një çerdhe me emrin “Yllka” dhe shkollën fillore dhe të mesme të ulët e njohur si “Shkolla Ndërkombëtare e Prishtinës”.
Institucioni arsimor “Gulistan”, Kolegjin e parë me emrin “Mehmet Akif” e ka hapur më 7 shkurt 2000 në Prishtinë.
Madje, hapja e këtyre shkollave dhe universiteteve ishte edhe një nga temat e diskutimit në mes të presidentit turk, Erdogan dhe kryeministrit shqiptar Edi Rama, në vizitën e fundit të Erdoganit në Shqipëri. Erdogan i kërkoi që të mbyllen këto shkolla pasi, sipas tij, ato “paraqesin rrezik të madh për shqiptarët”. Por, kjo kërkesë u hodh poshtë nga ministrja e Arsimit në Shqipëri, Lindita Nikolla.
Fetullah Gulen, i akuzuar për grusht shteti në Turqi, ka në pronësi një rrjet shkollash në Shqipëri dhe Kosovë
