Mesditën e sotme në zonën e Tufinës në Tiranë janë dëgjuar të shtëna armë. I plagosur ka mbetur një shtetas.
Plagosja mendohet se ka ardhur pas një konflikti të castit. Shtetasi me inicialet J.D. i moshës 42 vjeç ka qëlluar me armë në këmbë shtetasin D.K. për motive të dobta.
I plagosuri është transportuar në spital jashtë rrezikut për jetën.
Njoftimi i policise se shtetit:
“Plagosi me armë zjarri një shtetas dhe u largua, falë reagimit në kohë dhe veprimeve të shpejta dhe profesionale nga Policia, kapet dhe vihet në pranga autori i dyshuar. Sekuestrohet arma e zjarrit pistoletë, e dyshuar e përdorur gjatë krimit.
Shërbimet e Komisariatit të Policisë Nr. 4, pas marrjes së njoftimit se në Tufinë, shtetasi J. D., 42 vjeç, gjatë një konflikti për motive të dobëta, kishte plagosur në këmbë, me armë zjarri, shtetasin D. K., kanë organizuar menjëherë punën për kapjen e autorit të dyshuar.
Falë veprimeve të shpejta dhe profesionale, brenda një kohe rekord, shërbimet e Komisariatit të Policisë Nr. 4 kanë kapur dhe shoqëruar në komisariat, shtetasin J. D.
Në cilësinë e provës materiale u sekuestrua arma e zjarrit pistoletë, e dyshuar e përdorur nga ky shtetas.
Shtetasi D. K. aktualisht ndodhet në spital, jashtë rrezikut për jetën. Vijon puna nga grupi hetimor, për sqarimin e rrethanave të ngjarjes”, bën me dije policia.