Policia kroate ka njoftuar këtë të premte se ka vënë në pranga dy shqiptarë, pasi janë kapur në kufi duke tentuar që të trafikojnë kokainë dhe heroinë me një autobus.
Sipas policisë kroate, “dy shqiptarët 41 dhe 33 vjeç, të dy shtetas shqiptarë, janë afruar në kontrollin kufitar hyrës në QKM Karasovic, me një autobus pasagjerësh me targa shqiptare. Autobusi ishte bosh dhe drejtohej nga 33-vjeçari, ndërsa 41-vjeçari ishte shoferi zëvendësues”.
Gjatë kontrollit të imtësishëm janë konstatuar modifikime në kabinën e bagazhit, të cilat kanë sjellë dyshime për kontrabandë dhe është kërkuar një urdhër kontrolli.
Pas kontrolleve janë gjetur 10 pako të mbështjella me letër transparente, ku pesë prej tyre ishin me heroinë, me një peshë totale prej 5.4 kg, ndërsa pesë të tjerat përmbanin kokainë me peshë totale 5.6 kg./btvnews.al