Ministrja e Turizmit dhe Mjedisit, Mirela Kumbaro, ka uruar 14 shkurtin, ditën e Shën Valentinit me një foto të Kullës së Sahatit, pa kullat që i kanë marrë frymën prej 5 vitesh.
Në një postim të sajin në rrjetet sociale, Kumbaro ka vënë një foto për të cilën fotografi duhet të jetë mundur shumë, duke e kapur nga poshtë, me fokus nga Biblioteka Kombëtare, e vetmja anë që ka mbetur pa u rrethuar nga kullat që janë vetëm 3 metra larg monumenti të trashëgimisë kulturore të Shqipërisë.
‘Mirmëngjes me dashuri nga Tirana’, shkruan Kumbaro në Facebook, duke sjellë fotot e kullës pa kulla, të rrethuar me zemrat kineze me helium, që rivihen prej disa vitesh në muret e monumentit, çdo 14 shkurt.
Por komentuesit nuk ia kanë përtuar, duke iu përgjigur me foton reale: një monument që ia ka zënë frymën betoni, në juglindje. Njëra shkruan me ironi: “E vjetër foto që keni publikuar”, duke nxjerrë foton e kullës me kulla.
Para saj këtë veprim e ka bërë rëndom kryetari i bashkisë, Erjon Veliaj, që përmes PR të institucionit që ka dhënë lejet pë kullat, poston foto të kullës së Sahatit pa kulla.
