Hungaria planifikon të bashkëpunojë me Kroacinë për të rritur kapacitetin e tubacionit në Adriatik, që sjell naftën e papërpunuar jo-ruse në Hungari, tha në një konferencë të enjten, shefi i kabinetit të kryeministrit Viktor Orban.
Gergely Gulyas tha se qeveria kishte diskutuar strategjinë e energjisë për vitin 2030 dhe kjo do të përfshinte mundësinë që qendra e përpunimit të naftës e grupit hungarez MOL, të përpunojë më shumë naftë që nuk vjen nga Rusia.
Hungaria, një shtet pa dalje në det në Europën Qendrore, është një nga vendet më të cenuara në rajon ndaj importeve ruse të naftës dhe gazit. Qendra e përpunimit MOL merr naftë bruto përmes tubacionit Druzhba.
Rrjeti Druzhba e ka origjinën në Rusi dhe degëzohet në Bjellorusi dhe në Ukrainë, më pas kalon në disa vende të tjera në Europën Lindore dhe Qendrore, duke përfshirë qendrat e naftës në Hungari, Republikën Çeke dhe Sllovaki.
“Ne e dimë se nëse nuk do të vinte naftë bruto nga Rusia, atëherë dërgesat mund të vinin vetëm nëpërmjet detit, në tubacionin e Adriatikut. Por kapaciteti i këtij tubacioni është vetëm 70%-80% e asaj që do të nevojitej”, tha Gulyas në konferencë.
“Pra, ky është një projekt tejet i rëndësishëm, të cilin Hungaria do të dëshironte ta zbatonte së bashku me Kroacinë”, shtoi ai.
Gulyas tha se energjia bërthamore, burimet e rinovueshme, duke përfshirë energjinë diellore dhe zhvillimin e rrjetit kombëtar, do të jenë kyç për strategjinë që qeveria planifikon të financojë duke përdorur fondin e rimëkëmbjes të Bashkimit Europian, pasi të arrihet një marrëveshje për paratë.
Brukseli pezulloi shpërndarjen e fondeve të BE-së për Hungarinë, për shkak të një mosmarrëveshjeje mbi sundimin e ligjit, por Budapesti shpreson t’i zhbllokojë fondet deri në mesin e vitit./Monitor.al