Është drejt përfundimit shtrimi me asfalt i segmentit të rrugës së Arbrit në fshatin Plan i Bardhë të Bashkisë Klos.
Prej ditësh në këtë segment rrugor po punohet intensivisht që të bëhet shtrimi me asfalt i të gjithë rrugës nga Ura e Vashës deri në Qafën e Buallit.
Dhjetra makineri kanë punuar papushim në mënyrë që të përfundojë e vetmja pjesë e paasfaltuar e rrugës së Arbrit. Mesditën e kësaj të Marte vetëm pak metra ishin paasfaltuar, ndërsa pjesa tjetër është kryer e gjitha.
Po ashtu, paralelisht po punohet edhe për barrierat mbrojtëse që nga ura e Vashës në drejtim të Qafës së Buallit.Ndërkohë tuneli në dalje të urës së Vashës në anën e fshatit Plan i Bardhë po përgatitet që të jetë në funksion të rrugës e cila pritet që të hapet për qarkullimin e të gjitha automjeteve brenda pak ditëve.
Segmenti rrugor Ura e Vashës – Qaf Buall ishte i vetmi paasfalt ndonëse kishte përfunduar si trase që në vitin 2011. Hapja për qarkullim e këtij segmenti shkurton ndjeshëm kohën për të gjithë ata që udhëtojnë nga Bulqiza apo Dibra në drejtim të Tiranës dhe anasjelltas./btvnews.al