Mazhoranca dhe opozita janë pro heqjes së imunitetit të deputetit Arben Ahmetaj, për t’i hapur rrugë arrestimit që kërkon SPAK dhe kontrollit të banesës së tij.
Në mbledhjen e Këshillit të Mandateve, deputetët e mazhorancës njësoj si ata të opozitës deklaruan se janë dakord për t’i hequr imunitetin deputetit socialist Ahmetaj.
Pesë deputetët e opozitës në këtë këshill dorëzuan dhe një raport që i rekomandon seancës plenare të Kuvendit të Republikës së Shqipërisë të votojë për miratimin e dhënies së autorizimit të Prokurorisë së Posacme Kundër Korrupsionit dhe Krimit të Organizuar “Për dhënien e autorizimit për arrestimin/heqjen e lirisë, kontrollin personal dhe kontrollin e banesës së deputetit Arben Ahmetaj”.
Tashmë relacionet do të kalojnë për votim në Parlament, ku deputetët do të duhet të ngrenë kartonat për të miratuar ose jo heqjen e imunitetit të deputetit Arben Ahmetaj./btvnews.al