Cristiano Ronaldo është përsëri ai që bën histori. Futbollisti portugez është personi i parë që arrin 600 milionë ndjekës në platformën Instagram.
Rekordi historik vjen disa muaj pasi ai arriti 500 milionë në nëntor të vitit 2022. I njohur si një nga futbollistët më të famshëm në botë, ylli i kombëtares portugeze ndan vazhdimisht postime me fansat e tij. Sipas “Social Blade“, vetëm nga muaji i kaluar ka fituar më shumë se 150 milionë ndjekës.
“Forbes” shkruan se 38-vjeçari ka një vlerë neto prej 500 milionë dollarësh, duke e bërë atë një nga sportistët më të pasur dhe më të suksesshëm në botë.
Për herë të parë që nga viti 2017, Cristiano Ronaldo kryesoi listën e sportistëve më të paguar në botë, në “Forbes”, duke fituar edhe një titull të Rekordeve Botërore Guinness për fitimet më të larta vjetore për një sportist në vitin 2023.
Futbollisti argjentinas fitues i Kupës së Botës, Lionel Messi, është në vendin e dytë në listën e ndjekësve më të shumtë me 482 milionë.
Ndërsa këngëtarja dhe aktorja amerikane Selena Gomez është në vendin e tretë me 427 milionë ndjekës në Instagram. Kylie Jenner, Dwayne “The Rock” Johnson, Ariana Grande, Beyonce, Khloe Kardashian dhe Justin Bieber janë të famshmit e tjerë në listën e 10 personazheve më të ndjekur në Instagram.