Policia e Dibrës ka kallëzuar në prokurori një inspektor të Drejtorisë së Bujqësisë Administrimit të Ujrave dhe Kullotave në Bashkinë Dibër. Kallëzimi është bërë nën akuzën e “Shpërdorimit të detyrës” për mbrojtjen e zonës së caktuar të pyjeve në Selishtë.
Në Njoftimin e dhënë për mediat, policia bën të ditur se Komisariati i Policisë Dibër, referoi materialet në Prokurori për veprën penale “Shpërdorimi i detyrës”, në ngarkim të shtetasit H.K., 58 vjeç, banues në fshatin Selishtë, Dibër, me detyrë Inspektor në Drejtorinë e bujqësisë administrimit të ujrave dhe kullotave në bashkinë Dibër.
Nga hetimet e kryera ka rezultuar se ky shtetas duke mos ushtruar kompetencat ligjore që ligji e ngarkon me përgjegjësi, nuk ka informuar strukturat e policisë por ka lejuar dy banorë në zonën e tij pyjore, në vendin e quajtur, “Liqeni i Bataçes”, në fshatin Kacni, të prisnin pa leje 150 pemë ahu, dhe 25m³ lëndë drusore.
Policia thotë gjithashtu se po vijon hetimet e thelluara për dokumentimin e kësaj veprimtarie kriminale në dëm të mjedisit, identifikimin dhe kapjen e autorëve përgjegjës. #btvnews.al