Ilaria Sula, studentja me origjinë shqiptare në Itali, e cila ishte raportuar e zhdukur prej 25 marsit në zonën e Furio Camillo të Romës është gjetur e pajetë ditën e sotme nga disa persona.
Mësohet se 22-vjeçarja është gjetur e pajetë, me trupin e saj që ishte futur në një valixhe dhe më pas ishte hedhur në një kanal në zonën pyjore Poli të kryeqytetit italian.
Shkaku i vdekjes nuk është përcaktuar ende nga autoritetet, ndërsa policia ka zbuluar se ajo ka pasur një lidhje romantike me një shtetas nga Filipinet, i cili është identifikuar.
E reja ishte duke studiuar statistika në Universitetin Sapienza. Përveç familjes së saj, të cilët kishin alarmuar të martën në rrjetet sociale, për ta gjetur atë ishin mobilizuar edhe miq e kolegë, duke publikuar fotografi të shumta të së resë.
Hetimi mori një kthesë dramatike gjatë natës kur hetuesit e policisë mbërritën në banesën e filipinasit në via Homs, në lagjen afrikane , ku në mëngjes policia mjeko-ligjore kreu një inspektim.
Sipas dinamikës së zbardhur nga policia italiane, në mbrëmjen e zhdukjes së saj, Ilaria me sa duket ishte larguar nga shtëpia me nxitim për të takuar dikë.
Prindërit e saj, të cilët jetojnë në Terni, raportuan se ajo nuk kishte marrë asgjë me vete, madje as grim, por celulari i saj ishte duke punuar deri në një pikë dhe se dikush madje i ishte përgjigjur mesazheve të saj.
Është e paqartë nëse ishte vërtet ajo, ndërsa më pas telefoni i saj nuk ka punuar më.