Dihet botërisht që është një humbës i keq, Po ashtu, është e njohur lufta që i ka hapur të gjithë sistemit të futbollit në Turqi, që e quan të korruptuar.
Por këtë herë, Jose Mourinho ka kaluar çdo limit.
Trajneri portugez kapi nga hunda dhe rrëzoi në fushë kolegun e tij të Galatasaray, Okan Buruk, pas humbjes 2-1 dhe eliminimit të Fenerbahce në çerekfinalet e Kupës.
“Special One” kapi në befasi teknikun rival, që preferoi të mos reagonte. Gjithsesi, gjakrat u ndezën pas ndërhyrjes së futbollistëve të Galatasaray. Kjo ishte çmenduria e radhës e Mourinho në listën e gjatë të atyre që kanë shënjuar karrierën e tij, shumë herë të suksesshme dhe po aq të polemizuar.
Sipas mediave turke, portugezi pritet të marrë një dënim të rëndë, ndërsa nuk përjashtohet pezullimi deri në fund të sezonit. Deri atëherë, Mourinho duhet të përballet me kritikat e ashpra të të gjithë opinionit sportiv në Turqi, ndërsa për t’i hedhur benzinë zjarrit ka menduar klubi i Galatasaray, që ka publikuar në adresat zyrtare në rrjetet sociale një video tallëse ndaj “Special One”, duke e shoqëruar me komentin “Galatasaray të çmend”